கோதைத்தீவு: பெண்கள் மட்டுமே வாழும் ஒரு தீவு - வா.ராமசாமி ஐயங்கார்

அகசிந்தனைக்கு முதன் முதலில் கலை வடிவம் கொடுத்தவர் சர் தாமஸ் மூர் ஆவார். இவர் எழுதிய  “யூடோபியா” என்னும் நாவலில் அரசியல், சமூக அமைப்புகள் எந்தவித தவறும் இன்றி செயல்படும் ஒரு அற்புத தீவைக் கற்பனையாக படம் பிடித்துக் காட்டினார்.

இவரை முன்னோடியாக கொண்டே பல உயர்கனவு நாவல்கள் வெளியிடப்பட்டது. இவ்வரிசையில் தமிழ் நாவல் வரலாற்றில் வந்த முதல் நாவல் வா.ரா. வின் கோதைத்தீவு. விடுதலை மற்றும் சீர்திருத்த இயக்கங்களை ஒருங்கிணைப்பதில் ஆர்வம் கொண்டிருந்த இவர் பெண்ணிய சமத்துவத்தை கருப்பொருளாகக் கொண்டு தன் நாவலில் வலியுறுத்தினார்.

பெண்மைக்கு முன்னுரிமை தரும் சமூகம் இருந்தால் எந்தமாதிரியான விளைவுகள் ஏற்படும் என்பதே இந்த நாவல். கோதைத்தீவு முழுவதும் பெண் சுதந்திரத்தையே பேசியுள்ளார் வா.ரா.  இந்த தீவை உருவாக்கியதும் பெண்கள்தான். இதில் முதன் முதலில் நூறு பெண்கள் குடியேறினர். பின் அதிக அளவில் பெண்கள் அத்தீவை வந்தடைந்து ஒரு நகராக மாற்றினார்கள்.

பத்து ஆண்டுகளுக்கு பிறகு பெண் விடுதலையை ஆதரிக்கும் ஆண்கள் இந்த நகரத்திற்கு வந்தனர். இவர்கள் நூறு கன்னிமார்கள் வகுத்த சட்டத்தின்படியே நடந்து அங்கிருக்கும் பெண்களை திருமணம் செய்து கொண்டனர்.

கோதைத்தீவு-ன் சட்டங்கள் என்னவென்றால் பயிர் தொழில் மற்றும் இராணுவம் இரு பாலருக்குமே கட்டாயம் அதேபோல் சமையல் மற்றும் வீட்டு கடமைகளும் இரு பாலருக்கும் பயிற்சி அளிக்க வேண்டும். அது மட்டுமின்றி அரசியல், சமயம், போர்த்தொழில் இதிலும் சம பங்கு உண்டு. விதவை திருமணத்திலும் ஒரு புதுமையை சொல்கிறார் வா.ரா. கணவனை இழந்த பெண் மூளி என்று சொல்லப்பட்டால் மனைவியை இழந்த ஆணை மோழை என மாற்றி பெயரளிகிறார்.

இங்கும் மறுமணம் உண்டு இந்த மறுமணம் மோழைக்கும், மூளிக்கும் மட்டுமே. பெண்களை இழிவு படுத்தும் புராணங்களும், பாடல்களும் இந்த தீவில் தடை செய்யப்பட்டுள்ளது.

மக்கள் அனைவருக்கும் ஒரே வகையான வீடு, நில ஒதுக்கீடு, நிர்வாக சீர்திருத்தம் என்று பல புதுமைகள் இந்த நாவலில் உள்ளன.  இந்த தீவில் நடக்கும் கற்பனை நிகழ்வுகள் வேறு எங்கும் காண முடியாத அதிசயங்கள் என்றே கூறலாம். இப்படி ஒரு பெண்ணியம் பேசும் நாவல் 50 களில் வந்தது என்றால் கொஞ்சம் வியக்கத்தான் வைக்கிறது. “கோதைத்தீவு”  பெண்ணியம் பேசும் ஒரு அழகான நாவல்