Yoga Benefits In Tamil: யோகா பயன்கள் மற்றும் வகைகள்

யோகா என்றால் என்ன? அதை ஏன் செய்ய வேண்டும்? எதற்கு செய்ய வேண்டும்? எப்படி செய்ய வேண்டும்? எப்பொழுது செய்ய வேண்டும்? என்ற கேள்விகள் நிறைய தோன்றுவதற்கு முக்கிய காரணம், யோகாவைப் பற்றின தெளிவான புரிதல் இல்லாததே,  இதனைப்பற்றி ஒவ்வொரு அறிஞர்களும் ஒவ்வொரு விளக்கத்தை தருகின்றனர். இதனாலேயே பல குழப்பங்கள் ஏற்பட்டு பல கேள்விகள் எழுகின்றன. இந்த குழப்பங்களும், கேள்விகளும் எழாமலிருக்க சரியான அணுகுமுறையுடன் யோகாவை கற்று அதை செயல்படுத்தி ஆரோக்கிய வாழ்வை மேற்கொள்ளவேண்டும். 

இந்திய கலைகளில் யோகக்கலை பழம்பெரும்கலையாக போற்றப்பட்டு வருகிறது. பல்லாயிரம் ஆண்டுகளுக்கு முன் தோன்றிய இக்கலைக்கு எழுத்து வடிவம் கொடுத்து யோகசூத்திரம் அமைத்து. உயிரூட்டி நிலைபெறச் செய்தவர். ஐந்தாயிரம் ஆண்டுகளுக்கு முன் வாழ்ந்த பதஞ்சலி முனிவர் ஆவார்.

இவர் யோகத்தின் தந்தை எனவும் அழைக்கப்படுகிறார். இதனால் யோகக் கலையும் பதஞ்சலி யோகம் என்றே அழைக்கப்படுகிறது. யோகா என்ற வடமொழி சொல்லுக்கு இணைத்தல் அல்லது ஒன்றாதல் அல்லது ஒருமுகப்படுத்துதல் என்று பொருள். உடலோடு உயிர் இணைந்து நிற்க வேண்டும். உயிரோடு மனம் ஒன்றுபட வேண்டும்.

உடலும், மனமும் இறைநிலையோடு இணைவதே யோகம். என்பதே அறிஞர்களின் விளக்கமாகும். இறைநிலை தெளிவில் இருந்துக் கொண்டு இறைநியதிகளை உணர்ந்து அவற்றிற்கு முரண்படாது அவற்றை மதித்து அவற்றிற்கு இசைவாக வாழ்தலே யோகம் ஆகும். யோகாவில் வெற்றி பெறுவதற்கு ஆசனப்பயிற்சிகள் மிகவும் உதவுகின்றன.

பதஞ்சலி முனிவர் யோகக்கலையை எட்டு பிரிவுகளாக பிரித்துள்ளார். அவைகள் இயமம், நியமம், ஆசனம், பிராணாயாமம், பிரத்தியாகரா, தாரனா, தியானம், சமாதி எனப்படும். இதில் மூன்றாவது அங்கமே உடலை சரிசெய்யக்கூடிய யோகாசனம் ஆகும். இது தியானம் செய்ய உடலை தயார் படுத்துவதுடன், நோய் வராமல் உடலை  காக்கிறது. எல்லா வயதினரும் எளிதில் செய்யக்கூடிய ஆசனங்களாக மட்டுமே குறிப்பிடப்பட்டுள்ளது. இந்த ஆசனங்கள் உடலை இருக்கமின்றி வைத்துக்கொள்ள உதவுகின்றன. மேலும் இந்த ஆசனங்களை செய்துவிட்டு, தியானம் செய்யும்போது மனம் எளிதில் ஒருமைப் படுத்தப்பட்டு, ஒருமுகச் சிந்தனை தோன்றி தியானத்தில் கவனம் செலுத்த முடிகிறது. 

யோகாசனம் செய்வதற்கு வயது வரம்பு 8 வயது முதல் 80 வயதிற்கு மேற்பட்டவர்களுக்கு ஆசனங்களை செய்யலாம். மனதை ஒருநிலைப் படுத்தி செய்தல் மிகவும் அவசியம்.