Bharat Taxi : ஓலா, ஊபர் நிறுவனங்களுக்கு போட்டியாக மத்திய அரசின் ''பாரத் டாக்ஸி'' சேவை அறிமுகம்..!

மத்திய அரசு பாரத் டாக்ஸி சேவையை இந்தியாவின் ‘முதல் கூட்டுறவு டாக்ஸி சேவை’ என அழைக்கிறது. மத்திய அரசின் மின் ஆளுகை பிரிவு மற்றும் கூட்டுறவுத்துறையால் இந்த பாரத் டாக்ஸி சேவை நிர்வகிக்கப்படும் எனவும், ஓலா, ஊபர், ரேபிடோ போன்ற தனியார் செயலிகளுக்கு போட்டியாக இதில் குறைந்த டாக்ஸி கட்டணங்கள் நிர்ணயிக்கப்படும் என்றும் (Bharat Taxi) தெரிவிக்கப்பட்டுள்ளது. மேலும் தனியார் நிறுவன செயலிகளை போல ஓட்டுநர்கள் இதில் ஒவ்வொரு ரைடுக்கும் கமிஷன் செலுத்த வேண்டிய தேவையில்லை. அவர்கள் மாதந்தோறும் ஒரு சந்தா தொகையை இதில் செலுத்திவிட்டு பாரத் டாக்ஸி செயலியில் இணைந்து கொள்ளலாம். இந்த செயலியில் வரக்கூடிய ரைடுகளில் வாடிக்கையாளர் செலுத்தும் முழு தொகையும் ஓட்டுநர்களுக்கே செல்லும். இதனால் ஓட்டுநர்களுக்கு பெரிய அளவில் லாபம் கிடைக்கும். மேலும் இந்த சேவை முதலில் டெல்லியில் தொடங்கி பின்னர் மும்பை, புனே, லக்னோ, பெங்களூரு, சென்னை என பல்வேறு நகரங்களுக்கு இது விரிவாக்கம் செய்யப்பட உள்ளது. வரும் 2026 ஆம் ஆண்டு மார்ச் மாதத்திற்குள் இந்தியாவின் அனைத்து மெட்ரோ நகரங்களிலும் பாரத் டாக்ஸி மக்களின் சேவை பயன்பாட்டில் இருக்கும் என அதிகாரிகள் கூறுகின்றனர். மேலும், இந்த பாரத் டாக்ஸி சேவையில் ரெண்டல், லோக்கல் ட்ரான்ஸ்ஃபர், அவுட் ஸ்டேஷன் என மூன்று சேவைகளை பெறலாம்.