Dadasaheb Phalke Award 2023 : நடிகர் மோகன்லாலுக்கு 2023-ம் ஆண்டுக்கான தாதாசாகேப் பால்கே விருது

மலையாள சினிமாவின் உச்ச நட்சத்திரமாக வலம் வருபவர் மோகன்லால். 1980-ம் ஆண்டு திரைத்துறையில் அறிமுகமான மோகன்லால் இன்று வரை தொடர்ச்சியாக இயங்கி வருகிறார். இந்திய திரைத்துறையில் ஒரே ஆண்டில் 34 படங்களை ரிலீஸ் செய்து அசத்தியவர் மோகன்லால். மேலும் அதில் 25 படங்கள் பாக்ஸ் ஆஃபீஸில் வசூல் குவித்துள்ளது. 

1980-ம் ஆண்டு இயக்குநர் ஃபாசில் இயக்கத்தில் வெளியான ‘மஞ்சில் விரிஞ்ச பூக்கள்’ படத்தின் மூலம் திரைத்துறையில் நடிகராக அறிமுகமானார் மோகன்லால். தற்போது வரை 400க்கும் மேற்பட்ட படங்களில் நடித்துள்ளார். மோகன்லால் சமீபத்தில் பிருத்விராஜ் சுகுமாரன் இயக்கத்தில் ‘எம்புரான்’ படத்தில் நடித்திருந்தார். இந்த படம் பிளாக்பஸ்டர் ஹிட் அடித்து உலகளவில் பாக்ஸ் ஆஃபீஸ் வசூலில் ரூ.260 கோடிக்கு மேல் வசூலித்து, மலையாள சினிமாவில் ஒரு புதிய சாதனையை படைத்தது. அவர் ‘எம்புரான்’ படத்தின் வெற்றியை தொடர்ந்து நந்தா கிஷோர் இயக்கத்தில் ‘விருஷபா’ படத்தில் நடித்துள்ளார். இப்படம் வரும் அக்டோபர் 16-ம் தேதி திரைக்கு வருகிறது. மேலும் மோகன்லால் நடிகர் மட்டுமல்லாமல் பின்னணிப் பாடகர், தயாரிப்பாளர், தொலைக்காட்சி தொகுப்பாளர், இயக்குநர் மற்றும் எழுத்தாளராகவும் பணியாற்றியுள்ளார். இத்தனை ஆண்டுகாலம் திரைத்துறையில் நிலைத்த நட்சத்திர அந்தஸ்து கொண்ட நடிகராக வலம் வரும்  மோகன்லாலுக்கு மத்திய அரசு, தாதாசாகேப் பால்கே விருது அறிவித்துள்ளது.