Interesting Facts About Domestic Cows: நாட்டு மாடுகள் பற்றிய சுவாரசியமான தகவல்

நாட்டு பசுவின் சாணத்தில் மட்டும் கோடிக்கணக்கான நுண்ணுயிர்கள் உள்ளதால், அதன் எரு, மண் வளத்தை அதிகரித்து, சுற்றுச்சூழலைப் பாதுகாக்கிறது என்று வல்லுநர்கள் கூறுகின்றனர். இயற்கை விவசாயத்தை ஆதரிக்கும் திரு. நம்மாழ்வார் மற்றும் சுபாஷ் பாலேக்கர் போன்றோர் நாட்டு மாடுகள் நடமாடும் இயற்கை உர தொழிற்சாலைகள் என்பதை வலியுறுத்துகின்றனர். இயற்கை விவசாயத்தில் முக்கிய பங்கு வகிக்கும் “பஞ்சகவ்யா” நாட்டு பசுவின் கோமியம், சாணம், பால், தயிர், வெண்ணெய் ஆகியவற்றை கொண்டு தயாரிக்கபடுகிறது. மேலும் நமது முன்னோர்கள் பசுவின் சாணத்தில் விபூதி தயாரித்தனர்.

இவ்வளவு நன்மைகளை நமக்குத் தரும் நமது நாட்டு மாட்டு இனம் எதிர்காலத்தில் நம் சந்ததியினரின் முன் நடமாடுமா அல்லது புத்தகங்களிலும் புகைப்படங்களிலும் மட்டுமே பார்த்து தெரிந்துகொள்ளும் வகையில் அழிந்து போகுமா என்பது நம் கையில்தான் உள்ளது. இதற்கெல்லாம் ஒரே தீர்வு நாம் இயற்கை விவசாயத்திற்கு திரும்புவதும், நாட்டு மாடுகளை விவசாயத்திற்கு பயன்படுத்துவதும்தான். இயற்கை விவசாயத்தை முழுமையாக செயல்படுத்திய மாநிலமாக சிக்கிம் மாநிலத்தை அரசு அறிவித்துள்ளதை உதாரணமாகக் கொண்டு, நம் நாடு முழுவதும் இயற்கையின் பாதைக்குத் திரும்புவதற்கான முயற்சிகளை மேற்கொள்வது மிகவும் அவசியம்.