Kilambakkam Skywalk : கிளாம்பாக்கம் பேருந்து நிலையத்தில் ஆகாய நடைமேம்பாலம்

கிளாம்பாக்கம் பேருந்து நிலையத்தையும் கிளாம்பாக்கம் ரயில் நிலையத்தையும் இணைக்கும் உயர்மட்ட நடைமேடை (ஸ்கைவாக்) கட்டுமானப் பணிகள் (Kilambakkam Skywalk) நடைபெற்று வருகின்றன. கிளாம்பாக்கம் ரயில் நிலையத்திலிருந்து பேருந்து நிலையத்தின் மையப் பகுதி வரை 400 மீட்டர் நீளமுள்ள உயர்மட்ட நடைமேடை கட்டப்பட உள்ளது. நகரும் படிக்கட்டு மற்றும் மின் தூக்கி ஆகியவற்றுடன் கூடிய நடை மேம்பாலம் கட்டப்பட உள்ளது. கிளாம்பாக்கம் பேருந்து நிலையத்திலிருந்து ரயில் நிலையம் வரை உயர்த்தப்பட்ட நடைபாதை ரூ.79 கோடி மதிப்பீட்டில் கட்டப்பட உள்ளது. இதற்கான பணிகளும் தொடங்கப்பட்டு வேகமாக நடந்து வருகின்றன.

செங்கல்பட்டு மாவட்ட ஆட்சியர், கிளாம்பாக்கம் மேம்பாலம் கட்டுவதற்காக 45 சென்ட் நிலத்தை கையகப்படுத்த கடந்த ஆண்டு ஜூன் மாதம் ஒரு அறிவிப்பை வெளியிட்டார். இதை எதிர்த்து நீதிமன்றத்தில் வழக்கு தொடரப்பட்டது. இதில், நிலம் கையகப்படுத்தும் அறிவிப்பு ரத்து செய்யப்பட்டது. மேம்பாலம் பணி கட்டப்படுமா என்ற சந்தேகம் எழுந்தது.  இந்நிலையில், கையகப்படுத்த வேண்டிய நிலத்தில் நடக்கவேண்டிய பணிகளைத் தவிர்த்து, மற்ற இடங்களில் நடைபாதை மேம்பாலம் (Kilambakkam Skywalk) அமைக்கும் பணிகளை மேற்கொள்ள உத்தரவுகள் பிறப்பிக்கப்பட்டுள்ளன. அடுத்த சில மாதங்களில் இந்தப் பிரச்சினைகள் தீர்க்கப்பட்டு, நடைபாதை மேம்பாலம் பொதுமக்களின் பயன்பாட்டிற்கு கொண்டு வரப்படும் என்று எதிர்பார்க்கப்படுகிறது.