NASA Rover Discovery : செவ்வாய் கிரகத்தில் பண்டைய உயிரினங்கள் வாழ்ந்ததற்கான தடயங்கள் கண்டுபிடிப்பு

கடந்த 2021-ம் ஆண்டு முதல் செவ்வாய் கிரகத்தை சுற்றி வரும் பெர்சிவரன்ஸ் ரோவர் விண்கலம், ஜெசரோ பள்ள தாக்கில் அமைந்துள்ள பழமை வாய்ந்த ஆற்றின் படுகையில் இருந்து சேகரித்துள்ள மாதிரிகளில் கரிம கார்பன், இரும்பு பாஸ்பேட் மற்றும் இரும்பு சல்பைட் உள்ளிட்ட வேதியியல் கலவைகள் இருப்பதை (NASA Rover Discovery) கண்டறிந்துள்ளது. பூமியில் இருக்கும் நுண்ணுயிரிகள் கரிமப் பொருட்களை சிதைக்கும்போது, இந்த வேதிப்பொருட்கள் உருவாகின்றன. இந்த கண்டுபிடிப்பு குறித்து ஆய்வாளர் ஜோயல் ஹுரோவிட்ஸ் கூறுகையில், செவ்வாய் கிரகத்தில் இதுவரையிலான ரோவரின் தேடலில், பண்டைய கால வாழ்க்கைக்கான மிகச்சிறந்த மற்றும் மிகவும் உறுதியான தடயம் இதுவே என தெரிவித்துள்ளார். 

இந்த மாதிரிகளை பூமிக்கு கொண்டு வர அதிக செலவாகும், இதன் காரணமாக பூமிக்கு கொண்டு வரும் திட்டம் தற்போது தற்காலிகமாக நிறுத்தி வைக்கப்பட்டுள்ளது. இதற்கான மாற்றுத் திட்டங்களை நாசா ஆராய்ந்து வருகிறது. இந்த மாதிரிகள் பூமிக்கு கொண்டு வந்து ஆராய்ந்த பின்னரே, செவ்வாய் கிரகத்தின் பண்டைய வரலாற்றையும், அதில் உயிரினங்கள் இருந்ததா என்பதை பற்றிய பல கேள்விகளுக்கு விடை கிடைக்கும் என விஞ்ஞானிகள் ஆவலுடன் காத்திருக்கின்றனர்.