Norway Chess Series 2025 : நார்வே செஸ் தொடரில் மேக்னஸ் கார்ல்சனை வீழ்த்தினார் குகேஷ்

நார்வே கிளாசிக்கல் சர்வதேச செஸ் தொடரானது ஸ்டாவஞ்சர் நகரில் நடந்து வருகிறது. இதில் ஓபன் பிரிவில் நடப்பு உலக சாம்பியனான தமிழக வீரர் குகேஷ், 5 முறை உலக செஸ் சாம்பியன் பட்டத்தை வென்ற மாக்னஸ் கார்ல்சன் (நார்வே) உள்பட 6 சர்வதேச வீரர்கள் பங்கேற்றனர். இதில் ஒவ்வொரு வீரரும், மற்ற வீரர்களுடன் தலா இரண்டு முறை மோத வேண்டும். இந்த தொடரின் முதல் சுற்றில் கார்ல்சனிடம் கருப்பு நிற காய்களுடன் களமிறங்கிய குகேஷ் தோல்வியடைந்திருந்தார். இதனை தொடர்ந்து 6வது சுற்றில் உலகின் நம்பர் 1 செஸ் சாம்பியன் மாக்னஸ் கார்ல்செனுடன் தமிழக வீரர் குகேஷ் மோதினார். தொடக்கம் முதலே விறுவிறுப்பாக நடந்த இந்த ஆட்டத்தின் கடைசி நிமிடத்தில் நார்வே வீரர் கார்ல்சனை, குகேஷ் போராடி வீழ்த்தினார். இந்த வெற்றியின் மூலம் 8.5 புள்ளிகளுடன் புள்ளி பட்டியலில் 3வது இடத்திற்கு குகேஷ் முன்னேறியுள்ளார். மேலும் முதல் 2 இடத்தில் உள்ள கார்ல்சன் மற்றும் அமெரிக்க வீரர் ஃபேபியானோ விட குகேஷ் 1 புள்ளி மட்டுமே பின்தங்கியுள்ளார் என்பது குறிப்பிடத்தக்கது.