இராமநவமியான இன்று பகல் 12 மணியளவில் இலங்கை சுற்று பயணத்தை நிறைவு செய்து விட்டு மண்டபம் ஹெலிபேட் தளத்திற்கு பிரதமர் நரேந்திர மோடி வருகை தந்தார். அங்கிருந்து கார் மூலம் பாம்பன் சாலை பாலத்திற்கு வந்த பிரதமர் ரூ.550 கோடி செலவில் அமைக்கப்பட்டுள்ள பாம்பன் இரயில் பாலத்தை திறந்து வைத்து நாட்டுக்கு (PM Modi Inaugurates New Pamban Railway Bridge) அர்ப்பணித்தார். பின்னர் ரிமோட் மூலம் பிரதமர் நரேந்திர மோடி பாம்பன் புதிய ரயில் பாலத்தில் உள்ள செங்குத்து தூக்கு பாலத்தை மேலே உயர்த்தி கடலோர காவல்படையின் கப்பல் பாம்பன் பாலங்களை கடந்து செல்வதையும், பாலத்தின் செயல்பாடுகளையும் பார்வையிட்டார். இந்நிகழ்ச்சியில் ஆளுநர் ஆர்.என்.ரவி மற்றும் மத்திய இரயில்வே அமைச்சர் அஷ்விணி வைஷ்ணவ், மத்திய செய்தி ஒலிபரப்பு இணையமைச்சர் எல்.முருகன், தமிழக நிதி அமைச்சர் தங்கம் தென்னரசு ஆகியோர் கலந்து கொண்டனர்.